Ole Døsen Landmark (15. juni 1885–7. februar 1970) var ein norsk arkitekt.
Ole Landmark vart fødd og døydde i Bergen. Han var son av ingeniør Johan Peter Berg Landmark og Monsine Dorothea Landmark fødd Døsen. Ole Landmark tok eksamen i 1909 frå Trondhjems Tekniske Læreanstalt på arkitektavdelinga. Etter ei tid som assistent hjå arkitektane Schak Bull og Einar Oscar Schou i Bergen, oppretta Landmark eigen praksis i Bergen i 1910. Landmark teikna Forum kino og Bergens kunstforening i funksjonalistisk stil.
Landmark var, saman med arkitektar som Egill Reimers, Frederik Konow Lund, Kristian Bjerknes og Per Grieg ein del av «Bergens-skolen» i mellomkrigstida. Ole Landmark hadde ei lang rad oppdrag for rike bergenske borgarar. Han teikna Forum kino i funksjonalisme med innslag av art deco. Forum Kino vert rekna som det viktigaste verket hans og er eit hovudverk i norsk funksjonalisme. Bygget er i dag ein av få kinoar frå den tida som er teke vare på intakt.
[nn]