Helle, Sigbjørn Steinarson (1815 - 1899) [nn]

Sigbjørn Steinarsson Helle (fødd 14. juli 1815 på Helle i Fjotland, død 24. juni 1899) var gardbrukar, lærar og politikar. Han var gift med Anne Sofie Tronsdotter Veggeland (1819-1877). Foreldra hans var Steinar Torsson Eiesland (1770-1853) og Torborg Larsdotter (1780-1828).

Sigbjørn vaks opp på garden Dør heima på Helle i ein syskenflokk på ni. Han gjekk og las 2-3 månadar for presten Torger Melbye, og vart deretter skulemeistar (omgangsskulelærar) frå 1837 til 1856. I 1840 overtok han deler av heimgarden Dør heima (Bnr. 1/Lnr. 646) etter broren Lars. Han vart valt inn i Kvinesdal herradsstyre i 1843, fram til 1849. Deretter vart han innvalt igjen i 1853, fram til Fjotland var eit eige herrad igjen i 1858. Han vart då medlem i Fjotland herradsstyre fram til 1890. Han var ordførar i Kvinesdal i ein periode 1854-1858 og i Fjotland i tre periodar 1862-1868, 1870-1876 og 1879-1890. Mens han sat i heradstyret var han òg komsar. Han var leiar for matrikkelkommisjon for Fjotland og Kvinesdal, og medlem i matrikkelkommisjonen for Lister og mandal amt.^[1]

I 1857 vart han 2. suppleant til stortinget og i 1859-1860 var han 1. suppleant. I perioden 1862-1863 møte han på tinget som 4. representant for Lister og Mandal amt, og likt på det overordentlege storting i 1864. I 1865-1866 og 1868-1869 møtte han som 1. representant.^[2] Han sat i justiskomité nr. 2 i perioden 1862-1863 og 1865-1866.^[3]

Han var kjent for å vere dyktig i juridiske saker til tross for hans avgrensa utdanning.^[4]

Han vart valt til leiar for det fyrste forstandarsskapet i Fjotland Sparebank som vart valt av innskytarane i banken i 1884.^[5]

1. ↑ Jerstad, Johan: Fjotland: Sogebok. Fjotland. 1949. Digital versjon på Nettbiblioteket, s. 388
2. ↑ Lindstøl, Tallak: Stortinget og statsraadet. Utg. Steen'ske bogtrykkeri. Kristiania. 1914. Digital versjon på Nettbiblioteket, side 364
3. ↑ Lindstøl, Tallak: Stortinget og statsraadet. Utg. Steen'ske bogtrykkeri. Kristiania. 1914. Digital versjon på Nettbiblioteket, side 323 & 340
4. ↑ Jerstad, Johan: Fjotland: Sogebok. Fjotland. 1949. Digital versjon på Nettbiblioteket, s. 389
5. ↑ Jerstad, Johan: Fjotland: Sogebok. Fjotland. 1949. Digital versjon på Nettbiblioteket, s. 180

Sigbjørn Steinarsson Helle (14. juli 1815–24. juni 1899) var ein norsk lærar, gardbrukar og stortingsmann frå Fjotland i Vest-Agder.

Far hans var gardbrukar. Sjølv var han skulehaldar i heimbygda frå 1837 til 1856. Frå 1840 var han gardbrukar på farsgarden i Fjotland. Han var medlem av heradsstyret 1843-90, ordførar i 30 år. Elles var han forlikskommissær 1843- 49 og 1853-90, samt formann i matrikkelkommisjonen i Fjotland.

Helle representerte Lister og Mandals amt på Stortinget 1862-63, på omframstortinget 1864, i 1865-66 og 1868-69. I heile si stortingstid var han medlem av justiskomiteen.

Han døydde på garden sin i Fjotland i 1899.