Fedje kyrkje (Kirke) [no]
Other languages: Fedje kyrkje (norwegian bokmål)
Fedje kyrkje er bygd i 1941, og ho er teikna av arkitekt Ole Halvorsen frå Bergen. Dette er den siste av ei rekke kyrkjer på staden sidan 1600-talet. Kyrkja er ei rektangulær langkyrkje med lægre, smalare kor med bråtte hjørne. I vest er det eit stort våpenhus med tårn. Kyrkja er i kvitmålt teglsteinsmur med store, rundboga vindauge, og med enkle kvadratiske vindauge i sakristi og dåpsrom.
Dei opphavlege fargane i interiøret er bevart, med lyst gråblått som hovudfarge. Inventaret er i nygotisk stil. Altertavla er laga omkring 1930 av Ivar Tangen og med måleri av Vilhelm Bjørknes. Omramminga har små tårn og spiss gavl, og måleriet viser Kristus som strekker hendene ut. Innskrifta er ”Kom til meg”. Den gamle døypefonten frå 1800-talet oppbevarast på kyrkjeloftet, mens det i kyrkja i dag står ein nyare åttekanta døypefont. Preikestolen, som er dekorert med lyseblå skymaling, skal, i likskap med altertavla, ha stått i den eldre kyrkja frå 1888. Benkene har enkle rektangulære vangar med bladdekor. I våpenhuset heng det eit måleri frå 1600-talet som viser Josefs møte med Jakob og brødrane. Kjelder: Lidén, Hans-Emil og Vidar Trædal: Norges Kirker, Hordaland III, Oslo 2003
Work in progress...